O asubío ao correr do aire é unha fábula anarquista que nace como unha historia de amor. Oscilando entre o acedo e o pastoril, perfectamente abordable como alegoría, o primeiro cómic longo de Butzbach énchese de ecos románticos e arts & crafts para falarnos de lecer, horticultura e revolución. Unha enorme e ruidosa pataca ameaza con esmagar unha pequena poboación francesa. Louka Butzbach reelabora as orixes da súa cidade natal, Fontenay-sous-Bois, nos arredores de París no cómic que foi a súa presentación como unha das voces máis interesantes da nova banda deseñada francesa.