Novela gráfica sen ficción e inclasificable, catálogo en viñetas do Museu Nacional d’Art de Catalunya, ensaio visual e narrativo, crónica das institucións culturais do século XXI, O Museo inspírase nos frescos románicos, os retablos góticos ou a pintura moderna para lembrarnos que o cómic é unha linguaxe tan antiga como poderosa. Á vez que percorre un museo concreto, viaxa pola historia da arte e das ideas, desde as covas prehistóricas ata as pantallas contemporáneas. Faino a través de personaxes soados, como Francisco de Goya, Jacint Verdaguer, Lluïsa Vidal, Pablo Picasso ou Carmen Amaya, pero tamén dun vixiante de seguridade, unha empregada que perdeu a vista ou un profesor de secundaria e os seus alumnos. Porque os museos son os espazos onde os mestres conviven cos cidadáns. E onde todos aprendemos.